Úr þingsal
Á síðasta degi Alþingis samþykktu þingmenn lög nr. 85/2012 um breytingar á þingsköpum. Í þingsköpum er m.a kveðið á um ræðutíma, meðferð þingmála o.s.frv. Í þetta sinn notuðu þingmenn tækifærið og færðu sjálfum sér kjarabætur með breytingu á lögum um þingsköp. Það eiga þingmenn ekki að gera. Þeir heyra undir Kjararáð, sem ákveður laun þeirra og kjör. Fjörutíu og fjórir þingmenn úr öllum flokkum greiddu kjarabótum sínum atkvæði. Einn sat hjá og átján voru fjarverandi.
Hvaða kjarabætur var svo hér um að ræða. Jú, þingmenn eru að taka sér ýmis hlunnindi, sem Kjararáð hefur ekki valið að veita þeim. Í greinargerð með frumvarpinu segir:
Með breytingunni er lagt til að í almennum reglum forsætisnefndar um þingfararkostnað megi ákveða að alþingismenn skuli eiga rétt á að fá greiddan ýmsan kostnað, svo sem við kaup á gleraugum eða heyrnartækjum, krabbameinsleit, líkamsrækt o.fl. [leturbreyting ÓA] Hér er farin sambærileg leið og kjararáð ákvað 19. desember 2006 og fól í sér að embættismenn skyldu eiga rétt á greiðslum úr Styrktarsjóði BHM. Ekki er þó lagt til að stofnaður verði sérstakur fjölskyldu- og styrktarsjóður fyrir alþingismenn heldur fari um rétt alþingismanna í þessum efnum með sambærilegum hætti og um rétt embættismanna. Jafnframt felur þetta ákvæði í sér rétt alþingismanna til fæðingarstyrks eins og á við um embættismenn. Er fyrirhugað að forsætisnefnd setji nánari reglur um hann.
Kjararáð ákvað að veita embættismönnum þessi fríðindi og mjög má deila um réttmæti þess. Ljóst er hins vegar að Kjararáð vildi ekki veita þingmönnum þessi hlunnindi. Annars hefði ráðið tekið ákvörðun um slíkt.
Einungis tíundi partur þjóðarinnar ber traust til Alþingis. Ein orsök þessa víðtæka vantrausts er siðlaus sjálftaka þingmanna svo sem birtist í þessari lagasetningu. Þarna standa allir flokkar saman. Stjórnmálastéttin sér um sig. Svo furðar þetta fólk sig á því að fólkið í landinu fyrirlítur það.
Deila ekki kjörum með þjóðinni
Hvernig tengist það þingmennsku að fá ókeypis gleraugu, heyrnartæki, krabbameinsleit, líkamsrækt og fleira?
Þjóðin sem þingmenn segja lög býr við annan veruleika en þingmenn sjálfir. Ríkið tekur aðeins lítinn þátt í tannlæknakostnaði barnafjölskylda. Um daginn fékk barnafjölskylda á höfuðborgarsvæðinu kostnaðaráætlun vegna nauðsynlegra tannréttinga eins barnsins á heimilinu. Kostnaðurinn er áætlaður meira en 800 þúsund krónur á þriggja ára tímabili. Tannréttingin er nauðsynlegt vegna þess að ef ekki verður ráðist í hana munu tannræturnar eyðileggjast og barnið missa tennur sínar fyrir 25 ára aldur. Kostnaðarþátttaka ríkisins er 150 þúsund krónur. Stjórnmálastéttin gerir ekkert í þessum málum en tryggir sjálfri sér ókeypis árskort í líkamsrækt. Hvað ætli börnin séu mörg á Íslandi, sem sofna með tannpínu á hverju kvöldi á meðan þingmenn velja sér merkjagleraugu á kostnað foreldra þeirra?
Það yrði örugglega búbót fyrir fjölskylduna, sem þarf að borga meira en 800 þúsund í tannréttingar fyrir barnið sitt, jafnvel þó að ríkið auki ekki kostnaðarþátttöku sína í þessum heilbrigðiskostnaði, ef ríkið tæki að sér að borga gleraugu og líkamsrækt. Það safnast þegar saman kemur. En þingmenn vilja ekki að ríkið borgi tannlækningar barna eða gleraugu og heyrnartæki fyrir venjulegt fólk. Þingmenn láta ríkið borga þetta fyrir sig en ekki aðra. Þetta er ekkert annað en svívirðileg sjálftaka.
Vita ekki hvað kostar – er alveg sama
Einn flutningsmanna sjálftökufrumvarpsins var spurður á þingi hvað þetta myndi nú allt kosta ríkið og svaraði hann því til að kostnaðurinn væri hverfandi – það tæki því ekki einu sinni að minnast á hann. Sé þetta rétt hjá þingmanninum, sem raunar má efast stórlega um, má spyrja hvers vegna verið er að flytja kostnað, sem er svo lítill að það tekur því ekki að nefna hann, frá þingmönnum sjálfum yfir á ríkið? Á ekki annars að láta fjárlagaskrifstofu Fjármálaráðuneytisins reikna út kostnaðaráhrif allra frumvarpa?
Einstaklingum á vanskilaskrá fjölgar enn milli ára og nú eru hátt í 30 þúsund manns á þeim svarta lista. Flestir eru þar vegna stökkbreyttra lána – gengistryggðra og verðtryggðra. Tugþúsundir heimila eru í miklum skuldavanda sem þingið hefur ekki svo mikið sem lyft litla fingri til að taka á. Ekki hefur heldur verið tekið á skuldavanda atvinnufyrirtækjanna í landinu. Þúsundir fyrirtækja eru rekin fyrir náð og miskunn banka. Ekki gera þingmenn neitt í því.
Fólk stendur í biðröðum eftir matargjöfum og ekki gera þingmenn neitt í því. Þeir eru of uppteknir við sjálftökuna. Forgangsröðunin hjá Alþingi er skýr. Mestu skiptir að þingmenn þurfi ekki að kafa í eign vasa til að borga fyrir árskortið í líkamsrækt eða Alain Mikli gleraugun – nema þeir vilji D&G gleraugu. Það dugar ekkert nema það besta fyrir þingmenn. Skítt með pupulinn.
Hlusta ekki á fólkið í landinu
Kannski er það svo að allir þingmenn séu heyrnarlausir. Þeir heyra alla vega ekki í fólkinu í landinu og hlusta örugglega ekki á það. Skyldu góð heyrnartæki á kostnað pupulsins gera þingmönnum kleift að heyra betur í kjósendum? Hlusta þeir? Sé einhver von til þess er þeim fjármunum e.t.v. vel varið sem fara í kaup á heyrnartækjum fyrir þingmenn en þá á líka að skikka þá til að ganga alltaf með þau og stilla hljóðið á hæsta styrk.
Það er svo sannarlega góð ástæða fyrir því að þjóðin treystir ekki Alþingi. Sjálftökulögin nr. 85/2012 eru kristalstær birtingarmynd þess að þingmenn gefa skít í þjóðina og hugsa fyrst og fremst um eigin hag. Hafi þingmenn allra flokka megna skömm fyrir.
Það er mjög mikilvægt að þingmenn deili kjörum með þjóðinni. Við getum ekki svipt efnamenn úr hópi þingmanna eignum sínum og við viljum vitanlega að laun þingmanna séu mannsæmandi – jafnvel góð. Starfskjör þingmanna eiga hins vegar að vera gegnsæ og taka mið af starfskjörum fólksins í landinu en ekki æðstu embættismanna. Venjulegt fólk þarf að kaupa sér sín gleraugu sjálft og það borgar sjálft fyrir sína líkamsrækt. Verkalýðsfélög niðurgreiða sumt en þær niðurgreiðslur eru ekki gjöf heldur áunnin réttindi. Þingmenn hrifsa sér hlunnindi framyfir það sem Kjararáð ætlar þeim og fólki ofbýður.
Sem betur fer eru ekki nema níu mánuðir þar til þjóðin fær tækifæri til að hreinsa út þingmenn sem hugsa fyrst og fremst um sjálfa sig – sjá sig sem atvinnuþingmenn og myndu ekki sjá kjör fólksins í landinu með dýrustu Versace gleraugum – myndu ekki heyra ákall heimilanna með túrbóknúnum heyrnartækjum. Þessir þingmenn eru sjálftökulið sem þarf að hreinsa út af þingi. Þetta eru því miður næstum allir þingmenn.
Burt með þetta lið!
